Марий йылме интернетыште…

0
99
гана онченыт

Интернет айдемын илышышкыже шыҥенак пура. Тӱрлӧ предприятий-влак, марий газет ден журнал, мер организаций-влак шке сайтыштым тӱрыснек марла вӱдат але марий вариантым темлат. Ме интернетыште марий сайт, блог-влакым шергал лекна. Палемдыме шуэш, тачысе кечылан интернетыште нылле вич наре марий шӱлышан сайт уло. Кок тӱжем латкумшо ийыште интернетыште «Марикино» киностудий да поэтесса Зоя Дудина шке сайтыштым ыштеныт, тыгак «Арслан»  этнокультурный интернет-журнал да тулеч моло марий сайт-влак шочыныт. Кугу пиал:  кок тӱжем латнылымше ийыште «Кидшер» лӱман сайт интернетыште пашам ышташ тӱҥалын. Марий йылме интернетыште вияҥеш манына гынат, но, чаманен каласыман, тушто марла мутланыше шагалрак вашлиялтеш. Чолга марий еҥ-влак, мурызо, актёр, журналист ятыр гана серышым рушла возат, но лач нине усталык шӱлышан еҥ-влак мемнам марий мероприятийышке кошташ кумылаҥден шогат. Тыгай сӱретым ужмек, марий калык, марий интеллигенций верч кумыл вола.
Возымо шотыштат каласен кодыман. Сайт-влак тӱрлӧ улыт, нуно тӱрлӧ стиль дене возкален шогат, но возымо годым шукынжо йоҥылышым ыштат. Предложенийым чын огыт чоҥо, пунктуаций да орфографий йоҥылышат вашлиялтеш.  Тидыже лудшылан ӧпкелалташ амалым луктеш.
Туге гынат, ме марий калыкым йӧратен, пагален илышаш улына. Шке калыкын йылмыжым, тӱвыражым, йӱлажым, тудын эртыме корныжым шарнаш кӱлеш. Мыланна нимо деч вожылаш. Марла мутланаш, йочанам марий йылмылан туныкташ, марий блогым, сайтым вӱдаш, марий йылме нерген вес калыклан каласкалаш, марий улмо дене кугешнаш, кажне еҥын тек кумылжо лийже.

Текстыште йоҥылышым муында гын, пожалуйста, йоҥылышым палемден Ctrl+Enter темдалза.

ВАШМУТЫМ КОДЫЗА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.