Вӱдшор тылзын коло визымше кечынже Йошкар-Оласе Марий кугыжаныш университет пелен республик кӱкшытан «Ший Талешке» фестиваль эртен. Фестивальым Марий кугыжаныш университет да Марий тӱвыра рӱдер эртареныт.
Мероприятий тӱҥалтыште марий калыкын талешкыже-влакым шарналтыме. Марий кугыжаныш университетын да И. С. Палантай лӱмеш колледжын чолга студентышт Марий тӱвыра рӱдерын вуйлатышыже Валерий Помпеевич Григорьевын вуйлатымыж почеш талешке-влакын чапкӱшт воктеке пеледышым пыштеныт.
А залыште улшо-влак деке саламлымаш мутым Марий Элысе тӱвыра, печать да калык паша шотышто министерствын калык да конфессий пӧлка вуйлатыше Игорь Садовин ойлен, а вара участник-влак шке пашашт дене палдареныт. Республикысе этапышке 16 тӱрлӧ паша пурен. Тыжечын эн сайжым жюри аклен. Тыге «Эн сай технический дизайн» номинацийыште Волжский районысо Сотнур кыдалаш школын тунемшыже Александров Глебын пашаже, «Эн сай да шкешотан выступлений» номинацийыште Курыкмарий районысо Йоласал школын тунемшыже Петрова Валентина палемдалтыныт. Шернур районын Марисола школын тунемшыже Андрей Максимовын да Йошкар-Оласе 14 №-ан гимназийын тунемшыже Виктория Ямнееваан пашашт ончылно лийын, но Андрейын выступленийже жап дене кӱчыкрак лийын, сандене эн ончыл верышке Виктория лектын. Каласен кодыман, кажне тунемшылан пашам ямдылымаште туныктышо-влак полшеныт. Нунылан кугу таум каласаш кулеш.
Фестивальым Марий кугыжаныш университетын студентше-влак Алина Макарова ден Владимир Аптулаев вӱденыт. Шке сылне мурыштым Татьяна Фоминых, Ольга Богачева, Людмила Фёдорова, Алина Макарова пӧлекленыт. «Чинчивий» кӱсле да «Ший памаш» куштышо ансамбль марий шӱлышым программышке пуртеныт.
Варажым «Тачысе кечын геройжо» йыргешке ӱстел эртен. Дискуссий клубым Вера Гордеева вӱден.
