«Элнет кундем — мастар кундем!» — лач тыгай лӱман фольклор, тоштер да муро фестиваль 6 июньышто Волжский район Шайра кундемысе Мӱшыл ер воктене эрташ тӱҥалеш.
Фестивальым Валентин Колумб лӱмеш рӱдер-тоштер, «Марий ушем» мер организаций, «У вий» самырык ушем, «ВийАр» тӱвыра да келшымаш кыл ушем, «Югорно» Регионысо мер организаций эртарат.
Элнет эҥер мучко верланыше кундемла гыч фольклор ансамбль, эстраде мурызо, кидмастар-влак чумыргат. Фестиваль Элнет кундемысе илышым ончыктышо шкешотан тоштерын выставкыж дене почылтеш. Тушто шке кугезына-влакын ыштен кодымо, марий илыш ойыртемым ончыктышо арвер да ӱзгар дене кажне кумылан еҥ толын кертеш.
А пайремым фольклор коллектив, эстраде мурызо-влакын концертышт шуят. Фестиваль 13 шагатлан тӱҥалеш.
Лекше йодышым 8-902-671 -99-65 (91-99-65) да 8-964-861-87-61 телефон-влак дене рашемдаш лиеш.