«Мый марла ойлем!» акций ынде куд ий почела (2008 ий гыч) шошым эртаралтеш. Акцийлан негызым В. Колумб лӱмеш рӱдер-тоштер пеленысе «ВийАр» самырык-влаклан ушем пыштен. Тиде ийынат «Мый марла ойлем!» акций лиеш. Тудо 29 апрельыште 17 шагатлан Йошкар-Оласе Царевококшайск Кремльыште эртаралташ тӱҥалеш. Ты гана акцийым Марий тӱүыра рӱдер, Тӱвыра, печать да калык паша шотышто министерстве окса полыш дене, «Чарласе Кремль» тӱвыра да историй комплекс, В. Колумб лӱмеш рӱдер-тоштер пеленысе «ВийАр» самырык-влаклан ушем, И. С. Палантай лӱмеш тӱвыра да сымыктыш колледж. Республикысе Самырык-влакын Правительствышт – калык-влак кокласе кылым вияҥдыме шотышто тӱшка, РФ-се Финн-угор университет-влакын студент ден аспирантыштын ассоциацийышт.
Акцийын тӱҥ шонымашыже: шочмо йылмым, тӱвырам арален да вияҥден шогаш.
Акций годым «Мый марла ойлем!» значок-влакым шаркалат. Тидын годымак тӱрлӧ мер пашам шуктат. 2013 ийыште калыкыште «Олаште илыше-влак марий йылмым могайрак кӱкшытыштӧ палат?» йодыштмашым эртареныт, чыла тидым видеош войзеныт. А тений чолга да самырык мер пашаеҥ-влак Йошкар-Оласе уремыште вывеске-влакын чын возымым ончат.
Акций кажне ийын ойыртемалтше тӱсым налеш, но кажне ийын концерт-программе дене мучашлалтеш. Тений акцийыште эстраде мурызо-влак, литератур да куштымо флешмоб лийыт. Каласен кодынем, тыгай акцийым кеч могай районышто эртараш лиеш. Тӱҥжӧ тиде акцийым эртараш кумыл гына лийже.
