Игорь Бушуевын выставкыже почылтын!

22 августышто Йошкар-Оласе тӱсымыктыш тоштерыште Марий Эл Республикын сулло сӱретчыже Игорь Бушуевын 50 ияш лÿмгечыжлан пöлеклалтше ончер почылтын.
Сӱретче-живописец Игорь Владимирович Бушуев — Марий Эл Республикысе тӱсымыктышын ик эн кугу мастарже. Игорь Бушуев Российысе сÿретче-влак ушемын членже улеш, да Марий региональный пöлкан пашаштыжат чот тырша.
Игорь Бушуев 1988 ийыште Йошкар-Оласе художественный училищым тунем лектын, да тачат мастарлыкшым шуара. Игорь Владимирович Бушуевын пашаже-влак шкешотан, композиций да образ шотышто сылне улыт. Сӱретче тÿҥ шотышто натур гыч пашам ышта. Мастар тÿрлö тÿслан поян волгыдо натюрморт-влакым ышта, тыгак тыглай арвер-влакын моторлыкыштым почын пуа.
Сӱретче шуко радынажым тӱсымыктыш тоштерлан пöлеклен. Тыгак Козьмодемьянскысе А.В.Григорьев лÿмеш художественно-исторический тоштер комплексыште, Российысе да йот элысе частный коллекцийыште улыт.
Финн-угор калыкын тÿвыражым да йÿлажым арален шогымашке да вияҥден колтымашке кугу надырым пыштымыжлан, тыгак отечественный тӱсымыктыш вияҥдаш полшымыжлан, 2007 ийыште Игорь Владимирович Бушуевым Мордовий Республикын тÿвыра министерствыжын да 2008 ийыште Российысе художник-влак ушемын дипломышт дене палемдалтын.
Игорь Владимирович — республикысе, регионысо, Российысе да тÿнямбал выставке-влакын участникше улеш. Сÿретче Марий Эл Республикыште сымыктышым пропагандироватлыме шотышто кугу пашам шукта да шке усталыкше дене кундемыштына тӱсымыктыш вияҥдымашке кугу надырым пышта.

Материалым mincult12.ru сайт негызеш ямдылыме,
Пётр Васильевын фотосӱретше-влак.

Кидшер
Шонымашым ешараш