«Кидшер» сайтым ынде руш йылме дене лудын кертыда!

«Кидшер» сайтыште марий тӱня дене кылдалтше шуко уверым, материалым лудаш да ончаш лиеш. Ты сайт шукерте огыл шочын гынат, калыкыште кумдан шарлен.
Сайтна марий калыкын илыш корныжо, тӱвыраже, йӱлаже нерген кумдан да келгын палдара. Тидын годымак, финн-угор калык-влак нергенат ятыр статья уло. «Кидшер» тичмашнек марий интерфейс дене пашам ышта. Те кажне лаштыклаштыже шканда оҥай да кӱлешан уверым муын кертыда.
«Тӱҥалтышыште «Кидшерыш» шуко шке возенна, а кызыт материалым марий журналист, мер пашаеҥ, тӱвыра аланыште тыршыше, туныктышо, тунемше-влак темлат. Молан «Кидшер» да мом тудо ончыкта? Руш йылмыш кусараш гын, тиде шомак «пульсым» ончыкта. Сайтыштына марий калык дене кылдалтше чыла событий дене палдарена. Уверым писын пуаш тыршена. Марий йылме да интернет, нерген шонкалымаш статьям, марий калыкын тӱрлӧ пайремже, йӱлаже нерген, лӱмлӧ еҥ-влак дене интервьюм, видеом, мурым, почеламутым да тулеч молымат сайтыште муаш лиеш», — каласкала сайтын тӱҥ редакторжо Николай Любимов.
Тачысе кечылан тиде интернет-журналым вияҥдаш ныл еҥ тыршен шога. «Чыланат кыртмен пашам ыштена. Шукерте огыл сайтышке у сыным пуртенна. Марий улмына дене кугешнена, шочмо йылмынам моктена да аклена, молымат тидлан туныктена, — ойла сайтын тӱҥ редакторжо – Николай Любимов. — Оҥай акций, конкурс, концерт программе-влакым эртарынена. Ушышто шуко шонымаш, проект пӧрдеш. Тудым шыҥдараш жап да тӱрлӧ ушемын полшымыжо кӱлыт. Тыге марий койыш дене илаш туныктена. Пашана арам огеш ышталт, шонем».
Сайт шке пашажым 1-ше январь (шорыкйол) 2014 ий гыч вӱда, но негызым тудлан 15 декабрьыште (теле) пыштыме. А 1 сентябрь (идым) 2014 ий гыч сайтын руш версийже пашам ышташ тӱҥалын.