«Ме шарнена! Мы помним!» бард муро ден поэзий республикысе фестиваль Йошкар-Олаште эртен. Фестиваль Кугу сарыште сеҥымылан 78 ий темме да Марий талешке кечылан пӧлеклалтын.
Ончычсо ийла семынак мероприятий патриот шӱлышан, шочмо элым йӧраташ таратыше, илышым умылаш полшышо муро ден почеламут-влак йоҥгеныт. Фестивальыш 14 мурызо да 7 поэт ушненыт. Нуно руш да марий йылме шке возымышт але сар годсо муро дене палдареныт.
Мероприятийыш Сервис технологий техникумын студентше-влакат ушненыт. Дмитрий Иванов, Анастасия Кузнецова, Мария Ускова сар годсо да патриотик сынан муро композицийым ямдыленыт. Кугурак «изашт» – отставкысе подполковник Аркадий Курочкин. Аркадий Максимович тыгак шке поэзий кумылжым почын, ачажын сар корныжым шарналтен ойлен.