Марий йылме дене икымше интернет-радиом Удмуртийыште пашаш колтеныт. Кызыт тудо сутка мучко сем произведений-влакым йоҥгалтара. Тидын нерген проектын авторжо, программист Сергей Селезнёв «Кидшер» сайтлан увертарен.
Селезнёвын мутшо почеш, интернет-радион эфирыштыже эре йоҥгышо рекламе уке, социал вот семын плейлистым чоҥаш да подпискылан оксам тӱлаш ок кӱл. Кызыт сутка мучко сем йоҥга, а ончыкыжым увер да марий мероприятий-влак нерген увертарымаш-влак йоҥгаш тӱҥалыт.
Пайдаланыше-влак интернет-радиом сайтыште але мобил приложенийыште колышт кертыт. Тудым «RuStore» приложений кевыт гыч тулен налаш лиеш. Лишыл жапыште «Google Play» да «App Store» кевытыштат вераҥдат.