Марий Элыште 9 кӱварым олмыктен пытарыме. Кӱвар-влакым олмыктымо пашан кузе кайымыже нерген Республикым вуйлатыше Юрий Зайцевлан транспорт да корно озанлык министр Александр Герасименко увертарен.
2023 ийыште чылаже 600 метрыш погынышо 12 кӱварым олмыктышаш улыт. Министр ӱшандарен ойлен: чыла кӱварым жапыштыже ачален шуктымо лиеш. Марий Элым вуйлатыше палемдыме пашам шыже кыдал марте ыштен шукташ кӱлеш манын.
Чыла пашажат график почеш кая да планым ончылгоч шуктат — тидыже куандара. Но ятыр объектше кугу огыл гынат, ял кундемыште верланеныт, ял-влакым ушен шогат, калыклан моткоч кӱлешан улыт. Паша эше шуко, тудым контрольышто кучаш кӱлеш, — каласен Юрий Зайцев.