Йӱштӧ Кугызан резиденцийыштыже У ий тургым тӱҥалын. Йӱштӧ Кугыза ден Лумӱдыр У ий йомаклан ӱшаныше йоча да кугыеҥ-влакымат Шернур районысо Кукнур селаште вучат. Тушто модмаш-влак 31-ше март марте шуйнат.
Йӱштӧ Кугыза Шернур кундемеш эше 2012-шо ийыштак верланен. Туддеч вара шке илемыштыже уна- влакым вашлиеш. Турист- влак йомак йолгорно дене мият, Чодыра оза, Эмлызе, Сонарзе, Маска дене вашлийыт, кож йыр хороводыш ушнат, курык гыч мунчалтат, Йӱштӧ Кугызан суртыштыжо чайым йӱыт, марий сийым тамлен ончат.
Йӱштӧ Кугызан илемышкыже билетым ончылгоч возалтме деч вара Пушкин карте денат налаш лиеш.