М.Шкетан лӱмеш Марий драме театр «Кеҥеж йӱд» музыкальный комедий дене черетан тургымжым петырыш.
Тургымышто коллективлан чынжымак моткоч тургым лийын. Паша лектыш куандара. Тиде жапыште сценыш куд у спектакльым лукмо. Артист-влак шке лӱмгечыштым бенефис да усталык кас дене палемденыт. Россий да тӱнямбал кӱкшытан театр фестивальлаште гына индеш гана шке вийым тергыме. 31 майыштак ик арня жап шуйнышо Финн-угор калык-влакын театрыштын XV тӱнямбал «Майатул» фестивальым петырыме. «Гамлет. Машина. Цемент» спектакль тиде фестивальыште кум номинацийыште лауреат лийын: «Эн сай режиссура» (Степан Пектеев), «Эн сай ӱдырамаш роль» (РМЭ-н калык артистше Светлана Строганова), «Эн сай пӧръеҥ роль» (Алексей Тетерин). С. Пектеев тыгаяк номинацийыште Национальный театр-влакын «Туганлык» фестивальыштышт «Йыван Кырла. Путевка в жизнь» спектакль дене палемдалтын. РМЭ-н калык артистше Антонина Антонова Чебоксарыште эртыше В. Кузьмина лӱмеш икымше фестивальыште «кокымшо планан эн сай ӱдырамаш роль» номинацийыште лауреат лийын.
Сеҥымашым еҥ-влак таптат. Садланак театр тургымым петырыме кастене шукыштым Культур, печать да калык-влакын пашашт шотышто министерствын Таумутшо да Чап танык дене палемденыт.
Тыгак лӱмлӧ марий журналист, поэт да чолга мер пашаеҥ Юрий Русановын премийжын лауреатше-влак пале лийыныт. Театр искусство аланыште тудым М. Шкетан лӱмеш Марий драме театрын актержо Марий Элын сулло артистше Павел Ефимовлан кучыктымо. Журналистикыште тений эн келшыше еҥлан учредитель-влак «Морко мланде» райгазетын тӱҥ редакторжо Анатолий Титовым шотленыт.