Интернетыште «Марла лудына» сылнымут марафон тӱҥалеш. Тудо 1-ше сентябрь гыч 21-ше сентябрь марте эрта. Организатор-влакын мутыш почеш, тиде гана прозым лудаш тӱҥалыт.
Кажне кечылан мыняр лаштык логалмым шотлаш лиеш, лудашлан посна жапымат ойыраш лиеш. Ондак лудшо-влаклан марий йылме дене поэзийымат, журнал ден газетламат лудаш темлыме. Участник- влаклан лудмо ужашым «ВКонтакте» вотышто вераҥдаш темлалтеш. Тидын годым #лудмашмарафон да #марлалудынамарафон хэштегым кучылтман.
Сылнымут марафон тений 10-шо январьыште тӱҥалын да квартал еда эртаралтеш. Марафоным «Ший корно» марий калыкле-тӱвыра автономий ден «Тамга» мер организаций эртарат.