Марий Элысе писатель-влакын ушемым Игорь Попов вуйлаташ тӱҥалеш

«Ончыко» журналын тӱҥ редакторжо Игорь Поповым Марий Элыште Россий писатель-влак ушемын региональный пӧлкажын председательжылан сайленыт. Тиде пунчалым организацийын тӱшка погынымаштыже луктыныт, «Кидшер» интернет-журналын корреспондентше увертара.

У вуйлатышын выступленийже годым икымше радамыште шогышо задаче-влакым палемдыме: вуйвер организацийын пужен ышталтмыжлан кӧра ушемын членже-влакын аттестацийым эртымышт, идалык мучаш марте документ-влакым шотыш кондымаш, тыгак поэзий да проза секций-влакым уэш ыштымаш.

Тылеч ончыч ушемым 2010 ий гыч Светлана Архипова вуйлатен.

Марий Эл Республикын писатель-влак ушемже 70 утла прозаикым, поэт ден драматургым уша, нуно руш да марий йылме дене возат. Организаций 1930 ий гыч шке историйжым наҥгая.

Кидшер