Марий Элыште Россий СК-ын следствий органже-влак тӱвыра тӧнежын ончычсо пашажым шуктышо директор шотышто уголовный пашам тарватеныт. Тудо кугу кугытан оксам должностной положенийжым кучылтын шолыштмылан титаклалтеш.
Следствийын версийже почеш, 2023 ий сентябрь гыч 2026 ий февраль марте титаклалтше, тӧнежын должностной еҥже семын, шке паша вержым кучылтын, тудлан ӱшанен пуымо бюджет оксам шолыштын. Тудо вес еҥым методистлан пашаш шогалтымым ондалчык семын ыштен, а вара пуйто тудын пашам писын ыштымыжлан да кугу лектышан улмыжлан премийым пуымо нерген кӱштык-влакым пеҥгыдемден. Тидын годым ончыктымо еҥ тӧнемыште пашам ыштен огыл. Пашадар да премий семын шотлымо оксам шке шонымыж семын налын да кучылтын. Тӧнежлан 530 тӱжем теҥге деч утла эҥгек ышталтын.
Ышталтше преступленийын чыла обстоятельствыжым рашемдаш виктаралтше следствий да моло процессуальный паша кызыт шукталтеш. Лийше эҥгекым пӧртылтымӧ шотышто мер ышталтеш. Тӧнежын моло должностной еҥже-влакын пашаштым, вес осал паша факт-влакым пален налаш манын, тергат.
