Писатель, журналист Валентин Борисович Исенековын шочмыжлан 2015 ий 19 мартыште 80 ий темеш. «Ямде лий» газет редакций 19 мартыште 16 шагатлан С.Г.Чавайн лӱмеш национальный книгагудышто Шарнымаш касым эртара. Касыште Валентин Борисовичын тунемшыже-влак, тауштен, тудлан пӧлеклалтше почеламутыштым лудаш тӱҥалыт. Йолташыже-влак шарналтен, тудын илышыже да усталыкше нерген ойлаш тӱҥалыт.
Кӧлан Валентин Борисович Исенековын лӱмжӧ шергакан, кӧ тудым порын шарна – чыладамат 19 мартыште С.Г.Чавайн лӱмеш библиотекыште вучена!
Валентин Исенеков – Одо мландын эргыже. Тудо 1935 ий 19 мартыште Удмурт АССР, Каракулинский район, Шопкер ялеш шочын. Кыдалаш шинчымашым Татар кундемысе Буймо шымияш школышто налын. 1950 ийыште, шымияш школым тунем пытарымек, Кама ден Юл эҥерлаште сплавщиклан пашам ыштен. Паша коклаште дневникым возен, тудын негызеш «Вӱд ӱмбалне» повестьше шочын. Аймырын прототипше – тиде Валентин шкежак. 1974 ийыште повесть посна книга дене лектын.
Вара Йошкар-Оласе культпросветшколышто тунемын, шочмо ялыштыже клуб вуйлатыше лийын.
1961 ийыште Н.К.Крупская лӱмеш Марий пединститутыш тунемаш пурен. 1963-1965 ийлаште, тунеммым кудалтен, Звенигово районысо «Передовик» газетыште пашам ыштен.
1967 ийыште Валентин Исенеков «Ямде лий» газет редакцийышке толын. Тыште шканже ӱмыраш верым муын – 21 ий (колымешкыже) туштак тыршен.
Валентин Исенеков – поэт-лирик. Икымше сборникше «Рвезе йӱк» маналтеш. Композитор-влак ятыр почеламутшылан семым сереныт. Кумдан шарлышыже – «Тыгеракын ойла письмажат», «Ош чайка».
Валентин Исенеков йоча писатель семын палыме. «А» гыч «Я» марте (1975), «Шӱдыр» (1980), «Мемнан Мики» (1986) книгаже-влакым йоча-влак кызытат куанен лудыт.
«Ямде лий» газетын пашаче коллективше.