Мо тугай википедий, чылан паледа, очыни. Кӧ огеш пале гын, википе́дий — эрыкан, пырля ыштыме шуко йылман интернетыште улшо энциклопедий. Кызыт кажне кумылан еҥ википедийыш пурен, чыла лаштыкыш тӧрлатымашым пуртен кертеш. Историйыш ончалына гын, англичан википедийым 2001 ийыште Джимми Уэйлс да Ларри Сенглер тӱҥалыныт. Кызыт википедий эн кугу да калыклан палыме интернетыште улшо эрыкан энциклопедий. Изи калыклан гын, википедий тиде кугу да кӱлешан площадке, йылмым да йӱлам аралаш пеш сай ӱзгар. Кызыт марий йылме дене гына кок википедий уло: олык марий — mhr.wikipedia.org да курыкмарий йылме дене — mrj.wikipedia.org.
Олык марий википедийлан неггызым 2009 ийыште сӱрем тылзын 10-шо кечынже пыштеныт ыле, а курык марий википедийым 2010 ийыште шыжа тылзын 17-ше кечынже почмо.
Тачысе кечылан, олык марий-влак шке википедийыштым шукырак пойдарен шогат, тидын нерген мыланна сайтыште «Пытартыш тӧрлатымаш-влак» лаштык ойла. Каласен кодыман, олык марий-влакын википедийыштышт 7232 лаштык уло, а курык марий-влакын 7191 лаштык. Тиде изирак куаным луктеш, но куанашыже нимолан. Марий википедийым вияҥдаш, умбакыжымат пойдараш еҥ-влак уке улыт. Ончыкшым неле сӱрет палдырнен кертеш, вет википедий – тиде калыкын (нацийын) ончыкылык тукымжылан возен кодымо тӱрыс шинчымашыже, историйже. Ме (марий-влак) ончыкылык тукымланна мом кодена?!
Автор: Николай Любимов, марий блогер.