Марий талешкына-влак дене чыла вере кугешнат. Теве Эстоныйыште улшо марий-влакат 28 апрельыште Марий талешке кечым палемденыт.
Пайремын официальный ужашыже Эстон калык тоштерын Ончер пӧртыштыжӧ 17 шагатлан тӱҥалын. Эн ондак, Василий Николаев марий талешке-влак нерген каласкален да видеопрезентацийым ончыктен. Вара лӱмлӧ эстон серызе Арво Валтон«Югорно» марий эпосым эстон йылмыш кусарымыж шумлык ойлен.
Татьяна Албахтина марий рушарня школ дене палдарен. Тиде школыш коштшо Эдвин Матвеев марла «Шошо толын, шошо» почеламутым йоҥгалтарен. Марита Шорникова ава нерген мурым муралтен. Лиза Салмиянова флейте дене марла семым шоктен.
«Тарту марий-влак ушемын» «Марий кумыл» ансамбль лӱмжӧ дене погынышо-влаклан мурпӧлекым Анна Мишина ден Елена Ласточкина ыштеныт. Ончыч А.Мишина Татарстан кундем рекрут мурым муралтен. Вара Анна ден Елена «Пиал дек кайыме корно» мурым шергылтареныт.
Вашлиймашым Марий Эл гыч толшо «Олык сем» ансамбль сылне концертше дене мучашлен.
Пайрем умбакыже Сылнымут пӧртыштӧ шуйнен. Тушто ансамбльын участникше-влак дене марла мутланаш, мурен кушталташ сай йӧн лийын.
Йоча-влак кузе марий талешкына-влакым ужыт ончер почын пуэн. Жюри эн сай пашалан М.Шорникован сӱретшым шотлен.
Тартуш, шке марий калыкшым пагален, пошкудо Финляндий гыч марий шанчызе Лидия Тойдыбекова-Мустонен толын. Тудо Тарту марий, толшо уна-влаклан шуко поро мутым ойлен.
Тиддеч ончыч «Олык сем» кок кечым финн-угор рӱдолаште, Обиницаште, лийын. Таче Талешке кечым Таллинныште палемденыт.
Ансамбльым Эстонийыш «Фенно-Угрий» ӱжын, Тарту мероприятий-влакым тӱҥжым «Тарту марий-влак ушем» да марий рушарня школ ямдыленыт да эртарен колтеныт.
Автор: Василий Николаев,
«Тарту марий-влак ушем» вуйлатыше