Ме чылаштым шарнена…

Сар… — шучко, нигӧлан кӱлдымӧ неле саман. Мутшак чоным туржшо, кочо, шинчавӱд йöршан. Кеч-могай сар шуко еҥым тулыкеш кода, ятыр самырык илышым пеленже наҥгая. 1418 кече ден йӱд мучко шуйнышо тиде Кугу Ачамланде сар 20 утла миллион ӱдыр ден эргыжым пытарен. Шочмо элна верч марий-влакат але марте уждымо патырлыкым, пеҥгыдылыкым ончыктеныт. «Кидшер» интернет-журнал «Ме шарнена» интернет-проект нерген увертара. 
Тиде проектна май гыч тӱҥалын ноябрь тылзе марте эрташ тӱҥалеш. 22 июнь марте, сарын геройжо, ветеранже-влак нерген палдараш тӱҥалына. А 22 июнь гыч 1 сентябрь марте «Писатель-фронтовик» циклым лудашда темлена. Октябрь тылзыште гын, «Сеҥымаш фотоальбомым» сайтыштына вераҥдена. Ноябрь тылзыште «Тачысе герой-влак. Могай нуно улыт?» теме дене йыргешке ӱстел погына.
Тиде интернет-проектыш тендамат ушнаш ӱжына. Сар нерген шке шонымашдам але сарыште лийше, фронтлан полшышо еҥ-влак нерген материалдам info@kidsher.ru электрон почтышкына вучена.

«Кидшер» интернет-журналын коллективше

Кидшер
Шонымашым ешараш