Тек шукырак шочеш муро йочалан!

Шукерте огыл Марий Эл Радиошто «Изи ӱдыр» муро йоҥгаш тӱҥале. Сылне йоча мурым Арина Морозова йоҥгалтара. Арина Морозова Приволжский кундемыште шочын-кушкын. Арина эше шкежат моткоч изи улеш. Тудо Приволжский посёлкышто верланыше кыдалаш школышто эше 1 классыште веле тунемеш. Моткоч чот мураш да кушташ йӧрата.   Мураш Аринам уста самодеятельный композитор Вячеслав Андреевич Осипов туныкта. Яра жапыште Арина фортепьяно ден шокташ тунемеш, бисер дене пидме кружокыш кумылын коштеш, а кушташ тунемме кружокыштат капшым лывырта, поснак марий да руш куштымаш-влакым йӧрата. «Изи ӱдыр» мурылан мутым Зоя Васильева ден Ирина Курочкина возеныт. Семжым Зоя Васильева да Вячеслав Осипов келыштареныт. Шомакшат мурышто моткоч сылне, поро кумылан лияш таратыше:

Ончалза могай сай ӱдыр…
Чылажат шотлан толеш:
Еҥ коклаште, школ пашаште,
Ончыл верышке лектеш.
Школыш куанен коштеш.
Пешак сайын тунемеш.
Могай чулым тиде ӱдыр –
Шольо-шӱжарлан пример.
Ача-авалан полша,
Кугыракым пагала.
Жапше уке черланаш,
Жап уке йокрокланаш.
Мурен-кушташат мастар!
Кумылжат моткоч яндар!
Мыят тудын гай лийнем!
Чыла вере шуктынем!

Чаманен каласаш логалеш, пытартыш жапыште йоча-влаклан марий муро-влак шагалрак возалтыт. Тек тыгай поро кумылан, сай шонымашан у йоча муро ош тӱняш шукырак шочеш, мурышо да колыштшо-влакым куандара! Тек «Изи ӱдыр» мурын илышыже кужу да волгыдо лиеш! Арина Морозован тиде икымше мурыжо илыш корныштыжо усталык аланыште икымше да пеҥгыде тошкалтыш лиеш.