«Кидшер» курыкмарла ойлаш тӱҥалеш!

Калыкыште сайын палыме «Кидшер» интернет журналыште ынде курыкмарий йылме денат уверым лудаш лиеш. Проект 1 июль гыч илышыш шыҥдаралтеш.
Курыкмарий версийын редакторжо Ольга Кузьмина ойла: «Кидшер» курыкмарла – тиде интернет-журналын у проектше. Тудо марий сандалыкыште лекше увер-влакым курыкмарла лудшо-влак деке намиен шукташ шонен ышталтын. Тушто увер-влак, тӱвыра, туныктымо да воспитаний аланыште тӱрлӧ оҥай вашлийын мутланымаш да шуко моло информаций лекташ тӱҥалеш. Тиде проектна калыклан келша манын, ӱшаныме шуэш. Вет курыкмарий йылме дене лекше посна увер сайт лийын огыл».
Ушештарена, «Кидшер» интернет-журнал марий калыкын илыш-йӱлаже, тӱвыраже нерген каласкала. Ончыч ты журнал олыкмарий да руш йылме дене лектын гын, ынде курыкмарла лудшо-влакланат илышын «шержым» шижаш йӧн лиеш. «Кидшерын» кажне лаштыкыштыже тӱрлӧ кӱлешан да пайдале увер лектеш. Таче кечылан сайт пашам ыштыже манын, шым еҥ тырша.
«Ме кугешнен кертына. Марий улмынам она мондо. Шке шочмо марий йылмына ден тӱвырана, илышыште мо у ышталтме нерген калыклан жапыштыже каласкален шогаш тыршена», – ойла сайтын тӱҥ редакторжо Николай Любимов. – Журнал лаштыклаште тӱрлӧ акций, конкурс-влак эртаралтыт. Ӱшаныме шуэш, курыкмарий йылме дене лекше алан у шонымашлан илышыш шыҥдаралташ, вашмутланымашлан полшаш тӱҥалыт, а тӱҥжӧ – курыкмарий велысе увер-влак дене палдаралташ уло калыклан йӧным пуа.
Пагалыме лудшо-влак, тендан иктаж темлымашда але тыланымашда лиеш гын, info@kidsher.ru эл. почтышкына серышдам вучена!

Кидшер
Шонымашым ешараш