Шӱм-чонышто ик сем йоҥга

Кодшо арнян элнан тӱрлӧ кундемлаштыже илыше марий самырык еҥ-влакым ушышо Россий кӱкшытан VII марий самырык тукым слёт эртыш. Слёт Россий кумдыкышто тӱшкан илыше марий калыкын чолга, пӱсӧ ушан, тачысе саман дене тӧр ошкылаш тыршыше ӱдыр-рвезыже-влакым пырля чумырыш.
Икымше гана тыгай слет 2009 ийыште Морко районысо Октябрьский посёлкышто эртен, а варажым Советский, Курыкмарий, У Торъял, Юлсер, Параньга районлаште лийыныт. Тений слёт Провой кундем Чакмарий кыдалаш школ пелен эртаралте. Кундемнан кажне районжо да марий-влакын тӱшкан илыме Пошкырт, Одо, Татарстан республикла, Виче, Моско да Санкт-Петербург гыч 67 ӱдыр-рвезе погыненыт ыле. Кажне ийын слёт тӱрлӧ теме дене эртаралтеш. Тений слёт Сылнымут идалыклан да Сеҥымашын 70 ияш лӱмгечыжлан пӧлеклалтын. Слётын программыже шкешотан да ойыртемалтше лийын.
Ӱдыр-рвезе-влаклан поснак психологий шанче кандидат, Югорск кугыжаныш университетын педагогике да психологий кафедрын доцентше Нина Геннадьевна Айварован, Марий Эл Республикысе тӱвыра, печать да калык-влакын пашашт шотышто министерствын калык-влак да конфессий-влак кокласе кыл пӧлкам вуйлатыше Игорь Геннадьевич Садовинын лекцийышт да семинар занятийышт келшен. Тылеч посна Россий Федерацийын калык-влак кокласе журналистике гильдийын вуйлатышыже Маргарита Лянге дене семинар эртен.
Слёт кайыме жапыштак кидмастар кружок-влак пашам ыштеныт, спорт модмаш, конкурс-влак, марий еш, йылме да йӱла нерген каласкалыше лекций эртеныт. Туге гынат, кеч-могай пашам тӱҥалмек, иктешлымашым ыштыман. Слётыштат шкешотан Марий калык погыным эртареныт. Шке коклаштышт Марий Оньыжам ойыреныт. Самырык ӱдыр-рвезе-влак погын кузе эртымым онченыт. Тӱрлӧ ситуаций лиймым палемденыт. Икманаш, тӱвыра, тунеммаш да каныме программе поян лийын.
Ме, марий-влак, тӱрлӧ кундемлаште илена, тӱрлӧ пашам шуктен шогена, эсогыл мутланыме йылмынат изиш ойыртемалтеш, но мемнам икте уша – ме ик калыкын шочшыжо улына. Ик ой да ик шонымаш дене илышаш, пашанам вораҥдарышаш улына. Тыгодым тӱвыра поянлыкнам, ойыртемалтше йӱланам арален да тукым гыч тукымыш шуэн колтышаш улына. Кажне самырык еҥ слёт деч мом-гынат ум налын да поро шарнымаш дене мӧҥгыжӧ пӧртылын. У йолташ, у шинчымаш, у шонымаш, ала-кӧжын изиш вашталтше тӱняумылымаш паша кумылым лукташ да эрелан чоным ырыкташ тӱҥалеш манын ӱшанен кодына.
Марий самырык тукым! Лийза тыгаяк поро, пашаче кумылан да волгыдо шинчаончалтышан.
Россий кӱкшытан VII марий самырык тукым слётым эртарыше Марий калык конгресслан, Звенигово муниципал районлан, Чакмарий кыдалаш школлан, «Интеллектуал» тӱвыра-увер рӱдерлан, учредитель-влак Марий Эл Республикысе тӱвыра, печать да калык-влакын пашашт шотышто министерствылан, Марий Эл Республикысе туныктыш да шанче министерствылан, Мер Каҥашлан кугу таум ойлена.

 

Кидшер
Шонымашым ешараш