Изи Тавра ялыште шукын спорт дене кылым пеҥгыдын кучат. Клубын лӱмын ойырымо пӧлемыштыже рвезе-влак пауэрлифтинг дене заниматлат ыле. Нуно тӱрлӧ таҥасымашке коштыт.
Теве Бронислав Митрофанов, Изи Тавра ялын шочшыжо, визымше ий пауэрлифтинг дене шкенжым шуара да ӱмаште Свердловск областьыште нелытым киен нӧлтымӧ дене кокымшо верым налын. «Изинек спортым йӧратем. Урал велне Верхний Пышма командыште улам. Армийыште Якутий ден Новосибирскыште лийынам, спецназыште служитленам. Мылам граждан илыш утларак келша, садлан военныйын корныж дене каен омыл. Ешан, икшыван улам. Пелашем Екатеринбург ола гыч. Школышто тунеммем годым эре марла кутыренна, кызытат ялыште марла мутланена. Шочмо йылмым огына мондо. Тылзылан ик гана ялыш толын каем, спорт пӧлемыште рвезе-влакым тренироватлем», — мане Бронислав.
24 ияш Александр Михайлов клубышто йӱк режиссерлан пашам ышта, тыгак спорт дене кылым куча. Ӱдырым эше налын огыл. Тудо Брониславын ученикше, арняште кум гана рвезе-влак дене тренировкым эртара. Тудо икымше ий гына заниматла, туге гынат Свердловск областьысе таҥасымаште икымше верым налын да чемпион лӱмым сулен. Клубышто «Золотая ракетка» да «Атлант» спорт ушем-влак пашам шуктат.
Мемнан кутырымашке эше Дима Иванов ушныш. Тудо Екатеринбургысо педколледжыште физкультурым туныктышылан да тренерлан тунемеш. «9 класс деч вара ял гыч каенам да ончыкшым тренер лияш шонем. Куштылго атлетик дене кылым кучем, кумшо ий куржталыштам, областьысе таҥасымаште вием тергем. Тунем лекмеке, шочмо Изи Тавра ялышке пӧртылам да школышто пашам ышташ тӱҥалам», — мане Дима. Рвезе 18 ийым темен. Ешыште кум йоча гыч тудо кыдалашыже. Марий улмыж дене кугешна.
Лудса «Шийгорно» проектым… Лудаш »
Татьяна Пчёлкина возен.
Иван Речкинын фотожо-влак.