Марий кугыжаныш университетысе Физике да математике факультет кажне ийын октябрь кыдалне ола воктенсе Пӱнчер отышто «Экстремал Интернет» спорт да технике модышым эртара. Тений тушко МарГУ гыч 7 команде ушнен. Ончыл верыш лекшаш верч ФМФ-ын вич да ИПП да ИЭУиФ гыч ик команде дене кучедалыныт. Модмаш спорт ориентирований семын эрта: вер-шӧрым ончыктышо картыште контрольный пункт-влакым вераҥдат. Команде кажныштыже станцийым палемдыме карточкым налеш да тушко куржеш. Тыште теоретический да практический заданийым пуат. Икымшыжым шукташ Интернет гыч уверым, провод деч посна кылым (GPS, GPRS, WAP, MMS, SMS) кучылтыт, кокымшыжлан – турист снаряженийым. Кок кече жапыште команде-влак презентацийым ончыктеныт, спорт таҥасымашке ушненыт, заданий-влакым шуктеныт, коллективыште шкем кучаш тунемыныт, шуко у йолташым муыныт. Вара отчетым ыштеныт: оҥай тат-влакым шарналтеныт, модмаш гыч фотосӱрет ден видеоклип-шамычым ончыктеныт.
Сеҥышыш физмат гыч «ПИнечки 2.0», «220 В» да «Фиксики 69» команде-влак лектыныт.
