Проектирований школ почылтын

Ноябрь тӱҥалтыште МарГУ-што Проектирований школым торжественно почмо. Тудын координаторжо – студент Константин Арон, тудо тенийсе кеҥеж форумласе конкурслаште кум грантым сеҥен налын. Вузын студентше-влак кажне ийын Россий кӱкшытан молодежный форумлаште («Таврида», «Территория смыслов», «iВолга» да молат) кугу чулымлыкым ончыктат. Тенийсе ий рекордлан поян лийын – шым проект сеҥышыш лектын. Тыгай лектыш вуз вуйлатыше-влакым Проектирований школым почаш кумылаҥден. Эн ончычак презентацийым темленыт, вара проект ямдылыме нерген кумдан каласкаленыт, тайм-менеджмент дене урокым эртареныт.  Погынышо-влак ончылно «Таврида» форумышто сеҥыше Татьяна Шашкова «Зажги себя» проектше нерген каласкален. «Таче почмо школ проектым ямдылымаште да тудын кӱкшытшым нӧлталмаште сай ошкыл лиеш, тӱрлӧ форумлаште сеҥыше радамышке лекташ сай шансым пуа», – палемден Татьяна.
Каласыман, таче университетысе школ 80 еҥым ушен шога, нунын радамышт ешаралтеш манаш, кугу ӱшан уло.

Леонид Гимаев

Кидшер
Шонымашым ешараш