Марий кугыжаныш университетыште «Интернет вотышто проект-влакым шарымаште увер политикын ойыртемже» теме дене туныктымо семинар цикл эртен. Тушко вузын 30 утла сотрудникше ден студентше ушнен. А семинарым Урал федерал университетын (Екатеринбург ола) вӱдышӧ специалистше-влак Polycom видеоконференцсвязь полшымо дене дистанционно эртареныт. Нуно проект-влакым шыҥдарыме годым верысе СМИ-ла дене кылым ыштыме, пресс-релиз, статья-влакым кузе возымо, медийный йӧным пайдалын кучылтмо нерген каласкаленыт.
Колышшо-влаклан Лонгрид проект нерген пален налаш оҥай лийын. Тидын нерген УрФУ-со медиа-рӱдер директорын алмаштышыже Дмитрий Бенеманский ойлен. Лонгрид – тиде Интернетыште текст информацийым пуымо у формат. Кунам виртуальный увер пеш кугу, тудым тӱрлӧ вставке дене «сӧрастарат»: ролик, презентаций, интерактивный картинке, цитате, сноско дене. Сандене лонгрид южгунам интерактивный картым але инфографикым ушештара. Нунын полшымо дене лудшо-влак текстыш пӱтынек «пурат».
Социальный сетьлаште проект-влакым шарыме опыт дене пресс-службын специалистше Елизавета Плеханова палдарен. Тудо официальный аккаунтым вӱдымӧ, студенческий редакцийлан пашаштым виктарен колтымо нерген каласкален.
Кажне семинар деч вара участник-влак шке шонымашыштым каласеныт, УрФУ гыч коллегыштын опытыштым каҥашеныт, нуным шке пашаштышт кузе кучылташ лийме нерген ойленыт.
Леонид Гимаев