Сылнымут корным ойырен налше самырык автор-влаклан ӱшанлын йол ӱмак шогалаш полшаш манын, В. Абукаев-Эмгак лӱмеш «Ший памаш» сылнымут фонд конкурсым увертарен.
Конкурс В.Абукаев-Эмгакын тыгай ÿжмутшо дене эрта: «Таче возымет теҥгечысе деч сайрак лийшаш!».
Конкурсын тÿҥ шонымашыже:
— шочмо йылме, сылнымут полшымо дене самырык авторын (кыдалаш да кÿшыл школышто тунемшын, тыгак кумда илыш корныш икымше ошкылым ыштышын) чон арулыкшым аралаш;
— кöргö чон куатшым пеҥгыдемдаш;
— шинчымашыжым кумдаҥдаш;
— йылме усталыкшым вияҥдаш.
Конкурсын ыштышаш пашаже:
— серыме пашалан кумылан ÿдыр-рвезе-влакым чумыраш;
— сылнымут полшымо дене рвезе еҥлан шочмо калыкнан историйжым, йылмыжым, тўвыражым, философийжым аклаш йöным ышташ;
— сылнымут гоч рвезе еҥын тÿняумылымашыжым кумдаҥдаш;
— сылнымут дене шÿлышӧ пиалан айдемым кушташ;
— самырык еҥлан усталыкшым вияҥдаш йöным ышташ;
— ончыкылык сылнымутчо, журналист-влакым кушташ.
Конкурсым эртарыше-влак:
— «Ончыко» сылнымут да мер-политик журнал: 424006, Йошкар-Ола, Панфилов урем, 39. Тел.: 41-47-85;
— «Марий Эл» газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 41-23-71;
— «Кугарня» самырык-влаклан газет: 424006, Йошкар-Ола, СССР Вооружённый Вийын 70-ше идалыкше урем, 20. Тел.: 45-43-72;
— «Кече-Солнышко» йоча журнал: 424004, Йошкар-Ола, Амстердам пл., 2. Тел.: 64-19-33.
Серымылан акым редколлегий пуа:
1. В.В.Краснов, поро кумылым ончыктышо «Ший памаш» фондым вуйлатыше.
2. Л.А.Абукаева, филологий науко доктор, Марий кугыжаныш университетын профессоржо.
3. А.С.Абдулов, «Марий Эл» газет» ООО-н директор-тÿҥ редакторжо, историй науко кандидат.
4. С.Д.Архипова, «Кече» журналын тÿҥ редакторжо, Россий писатель ушемын Марий Элысе пöлкажым вуйлатыше, поэт.
5. В.А.Кольцов, ВГТРК-н «Марий Эл» ГТРК филиалжын радиовещаний службыжын начальникше.
6. М.И.Матвеев, М.Шкетан лÿмеш Марий кугыжаныш драме театрын директоржо.
7. Э.А.Иманаев, «Кугарня» газет» ГУКП-ын директор-тÿҥ редакторжо.
8. Ю.И.Соловьёв, «Марий книга издательстве» савыктыш пöрт» ГУКП-ын директоржо, прозаик.
9. Г.Л.Сабанцев, Марий Элын калык поэтше.
10. И.Г.Попов, «Ончыко» журналын ответственный секретарьже, поэт.
Автор-влакын серымышт тыгай йыжыҥ дене аклалтеш:
— эн сай поэзий — «Кинде-шинчал» премий;
— эн сай прозо — «Ошкеча» премий;
— эн сай драматургий — «Кайыккомбо кашта» премий;
— эн сай журналист паша — «Почылтшо чон» премий;
— эн сай теле-радиожурналист паша, блогер — «Канде толкын» премий.
Конкурсын эртыме радамже:
— конкурсыш Россий Федерацийыште илыше, марла серыше 35 ий марте ийготан кажне самырык еҥ ушнен кертеш. Нуно, жанрым шотыш налын, пашам ыштышаш улыт;
— автор шке возымыжым (компьютереш поген печатлымым; 1 экз.) «Ончыко» журнал але «Марий Эл» да «Кугарня» газет редакцийлашке «В.Абукаев-Эмгак лÿмеш конкурсыш» палемдымаш дене колта;
— редколлегий (прозо, поэзий — Г.Л.Сабанцев, драматургий — Ю.И.Соловьёв, М.И.Матвеев, журналистике — В.А.Кольцов, Э.А.Иманаев) автор дене пашам ышта. Тыгодым кугу тÿткышым авторын мутвундо поянлыкшылан, марла ойым, сылнымут произведенийын кышкаржым чын чоҥен моштымылан ойырат;
— 1 ноябрь гыч 1 декабрь марте автор Фондын вуйлатышыж лÿмеш йодмашым сера. Газет ден журналлаште савыкталтше сылнымутшым але книгажым редколлегийлан аклаш темла. Документым «Ончыко» журнал редакцийыш кондыман;
— конкурсышто ик ийын ик номинацийыште сеҥышыш лекше вес ийын вес номинацийыш ушнен кертеш;
— конкурс Йошкар-Олаште Марий Элын калык писательже Вячеслав Абукаев-Эмгакын шочмо кечыжым палемдыме годым (декабрь мучаш) иктешлалтеш;
— конкурслык роскотым Фондын вуйлатышыже В.Краснов палемден. 2017 ийысе фонд — 100 тÿжем теҥге;
— сеҥыше-влаклан диплом ден окса премий (20 тÿжем теҥге) кучыкталтеш.
Шукерте огыл, жюри 2016 ийысе конкурсыш пурышо паша-влакым ончен лектын да сеҥыше-влакым палемден.
Эн сай теле да радио-журналист, блоггер паша номинацийыште «Ший памаш» фондын дипломжо да «Канде толкын» премий дене «Марий Эл Радион» вӱдышыжӧ Татьяна Соловьёва ден блоггер Николай Любимов палемдалтыныт. Поэзий номинацийыште Алёна Яковлева ден Вера Гордеева ойыртемалтыныт. Нунат диплом да «Кинде-шинчал» премий дене палемдалтыныт. Эн сай журналист пашалан «Марий Эл» газетын пашаеҥже Лидия Шабдарова ден «Кугарня» газетын пашаеҥже Татьяна Айтова «Виш чон» премийым налыныт.