Марий Элын главаже Александр Евстифеев тунемме литературым электрон форматыш шукырак кусараш шӱден

Марий Эл Республикын Кугыжаныш национальный политике концепцийжым илышыш пуртымо шотышто правительственный комиссийжын заседанийже эртарен. 

Марий Эл вуйлатыше Александр Евстифеев Марий Эл Республикын Кугыжаныш национальный политике концепцийжым илышыш пуртымо шотышто правительственный комиссийжын заседанийжым эртарен. 

Комиссийын участникше-влак республикысе Тӱвыра, печать да калык-влакын пашашт шотышто министерствын тиде концепцийым илышыш шыҥдарымаште мом ыштымыже, тыгак книга-влакым савыктыме, Марий Элысе образовательный организаций-влаклан учебникым да тунемме пособийым ситарыме нерген мутланеныт.

Тӱвыра, печать да калык-влакын пашашт шотышто министр Константин Иванов Калык-влакын пашашт шотышто федеральный агентствыште эртыше конкурсын иктешлымашыж почеш шушаш ийыште федеральный бюджет гыч Марий Эллан 11 миллионат 900 тӱжем теҥге субсидий ойыралтеш манын палемден. Александр Евстифеев министрлан С.Г.Чавайн лӱмеш библиотекым ачалаш кӱлмӧ нерген каласен. Республикысе образований да науко министрын алмаштышыже Нонна Антоничева палемден: тунемме пособий-влакым лукшо организаций-шамычым ойырен налме конкурс 3 ийлан ик гана эртаралтеш. Шушаш конкурс нерген увертарымаш тений сентябрь деч ончыч огыл лийшаш.

2008 гыч 2017 ий марте республикыште 53 тӱрлӧ тунемме пособийым 133 тӱжем тираж дене лукмо. Тидыже библиотеке фондым ий еда 15 процент марте уэмдаш йӧным ыштен.

Тӱвыра, печать да калык-влакын пашашт шотышто министрын алмаштышыже Галина Ширяева кугыжаныш полыш дене савыктышаш паша-влакым ойырен налме годым министерстве пеленсе эксперт комиссий нунын социально кӱлешан улмыштым шотыш налеш манын каласен. Марий Эл вуйлатыше республикыште савыктыме тунемме пособий-влакым электрон форматыш кусараш кӱлмым поснак палемден да тиде пашам чолганрак шукташ темлен.

– Тунемме литературым электрон форматыш кусарыме паша республикыште шукертак тӱҥалшаш ыле. Кызыт ме йомдарыме жапым поктен огына шу. Тиде пашам 2019 ийлан бюджетыш пурташ йодмашым сентябрьыште обязательно пуыман. Электрон форматыш кусарымаш ий гыч ийыш ышталтшаш, а ик татыште гына лийшаш огыл, – каласен Александр Евстифеев.

Калык-влакын пашашт, калык-влак кокласе кылым саемдыме да этнокультурный вияҥмаш шотышто советын пашаж дене Звенигово район администраций вуйлатыше Владимир Геронтьев ден Кужэҥер район администраций вуйлатышын алмаштышыже Надежда Желонкина палдареныт.

Регион вуйлатышын кӱштымыж почеш республикысе чыла муниципал образованийын администраций вуйлатышышт Тӱвыра, печать да калык-влакын пашашт шотышто министерствыш тӱвыра пӧрт-влакын технический состоянийышт могай улмо нерген уверым 1 сентябрь марте пуышаш улыт.

Тыгак правительствын комиссийжын еҥже-влак ола ден район-влакын администрацийыштлан ял шотан илемлаште социально-культурный сынан йодыш-влакым рашемдыме годым волонтер пашашке самырык-влакым ушаш темленыт, моло ой-каҥашымат пуэныт, палдара Марий Эл Республик вуйлатышын организаций-аналитике виктемже.

Л.Камалетдинова,
«Марий Эл» газет.

Кидшер
Шонымашым ешараш