Шӱдӧ утла боевой вылетым ыштен…

Кугу Ачамланде сар годым совет калык, тудын сарзывийже Шочмо элын эрыкшым арален налын, кугу исторический сеҥымашым таптен да уло тӱня калыкым фашист куллык деч утарен. Марий-влакат изи огыл надырыштым сеҥымашке пыштеныт.
Ты гана Совет Союз Герой Зарецких Михаил Александрович нерген «Ме шарнена» интернет-проектыштына каласкалена. 
Михаил Александрович Зарецких 1920 ий 7 кылмыште Таутово ялыште (кызыт — Киров область, Кильмезь район) шочын. Изинек чодырам колтымаште пашам ыштен. Шым классым тунем лекмек, Кировысе медицина техникумым да аэроклубым тунем пытарен. 1940 ий кеҥежым Зарецких Йошкар Армийыш шке йодмыж почеш каен. 1943 ийыште Чкаловский военный авиационный школым тунем лектын да шыжа тылзе гыч Кугу Ачамланде сарын фронтлаштыже лийын.
1945 ий вӱдшорышто лейтенант Михаил Зарецких 4-ше Украин фронт, 8-ше воздушный армий, 8-ше штурмовой авиакорпус, 227-ше штурмовой авиадивизий, 525-го штурмовой авиаполкын лётчикше лийын. Тудо жаплан тушман ден кучедалмашке, боевой техникым да тушманын вийжым чумырымо верлашке разведкыш 150 гана чоҥештен лектын. Чылаже сар жапыште Зарецких 182 боевой вылетым ыштен, тушманлан кугу эҥгекым конден.
СССР Верховный Совет Призидиумын Пунчалже почеш 1945 ий 29 пеледышыште «командованийын боевой заданийлажым образцово шуктымылан, фронтышто немыч тушман ден кучедалмаште лӱддымылыкым да геройлыкым ончыткымылан» лейтенант Михаил Зарецких Совет Союз Герой лӱмым налын да 6306 номер почеш Ленин орден ден«Золотая Звезда» медаль ден палемдалтын.
Сар деч вара Зарецких Совет Армийыште служитлен. 1957 ийыште майор званий ден запасыш лектын. Проживал и работал в Озаҥ олаште илен да пашам ыштен, варажым — Йошкар-Олаште. 1991 ийыште сулен налме канышыш лектын. Мер пашалан вий-куатым пуэн шоген, регионысо ветеран Совет ушемыште лийын. 2004 ий 30 телыште колен. Йошкар-Олсе Туруново шӱгарлаште тойымо.
Тыгак Йошкар Знамя кок орден, Отечественной войнан 1-ше степенян кок орден, Йошкар Звезда кок орден да ятыр медаль ден палемдалтын.

Материыалым ямдылыме годым
С. Г. Чавайн лӱмеш калыке книгагудын сайтшылан эҥертыме.

Кидшер
Шонымашым ешараш