Николай Любимов: «ВийАрышке» толын, йолташ лий!

«ВийАр» ушем республикыштына 2008 ий 19 ноябрь годсек пашам ышта. Кызыт тудым Николай Любимов вуйлата.
««ВийАр» тӱвыра да келшымаш кыл шотышто мер ушемыште кок ий улам, но школышто тунеммем годымак ушем дене кылым кучаш тӱҥалынам. Тушко пурымек, пресс-службо пӧлкам вуйлатенам. Ончычсо вуйлатыше Алексей Очеевын армийыш кайымыж деч ончыч ушем конференцийым эртарен. Правлений «ВийАрым» вуйлаташ мыланем ӱшанен. Ынде ик ий наре ты пашам шуктен шогем», — ойла самырык вуйлатыше. 
— Кодшо Марий погын деч вара могай паша ышталтын?
— Ныл ий жапыште шуко паша ышталтын. Тений кандашымше гана Марий самырык тукымын слётшо лиеш. «ВийАрын» еҥже-влак икымше слёт гычак организатор-влак радамыште улыт.
Республикысе Т. Евсеев лӱмеш Национальный тоштер пелен «Йыргешке пӱкен» клуб пашам ышта. Клубыш участник-влак тылзылан кок гана погынена да тӱрлӧ оҥай, тачысе кечылан келшыше темылан мутланена, уна, эксперт-влакым ӱжына.
«Книга — яллан» акцийым кумшо ий эртарена. Книгам кевытыште налын, але мӧҥгыштӧ аралалтше сай, но оккӱл книга-влакым иктаж ялысе школлан, библиотекылан пӧлеклаш кумылан кажне еҥым йодына. Икымше гана акций 2013 ийыште лийын. Кок тӱжем книгам погымо. А 2014 ийыште «Кидшер» интернет-журнал да «ВийАр» мер ушем ты акцийым кокымшо гана эртареныт. Тунам вич тӱжем книга да журнал-влакым погенна. Кодшо ийын, интернетыште «Ты акций кӱлешан мо?» йодыштынна. 90,9 % акцийым сайлан шотлен. Идалык мучко кум тӱжем наре савыктышым погымо.
Книга-влакым ятыр районлашке, тыгак марий-влакын тӱшкан илыме Одо, Татарстан, Пошкырт кундемлашке колтенна.
Ӱмаште шыжым тӱвыра да келшымаш кыл ушем да талантан йоча-влаклан национальный президент школ-интернат Сылнымут идалыклан пӧлеклалтше «Сылнымут батлым» эртарышт. Тений тудым республик кӱкшытыштӧ ышташ шонымаш уло.
Ушемын еҥже-влак 2009 ий годсек «Мый марла ойлем» акцийым эртарат. Тений тудо 26 апрельыште Чарла кремльыште лиеш.
А шукерте огыл Савинысе йочапӧртышкӧ пӧлек дене миен коштынна.
-Кызыт организацийыш мыняр еҥ пура?
— Тачысе кечылан ушемыште коло наре еҥ шотлалтеш. Иктаж у проектым илышыш шыҥдарена але мероприятийым эртарена гын, пашашкына моло еҥымат ӱжына.
— Тыланда мероприятийым эртараш кӧ полша? Вес молодёжный организаций-влак дене пырля пашам ыштеда?
— Пашам шкет ышташ да сай лектышыш шуаш йӧсӧ. «ВийАрын» шуко ушем дене кылже уло. «Россий президентын 85 йолташыже» проектыш тӱрлӧ регионысо самырык тукым организаций-влак пурат. Шукерте огыл марий ушемнан чолга еҥже-влакат президентын йолташыже радамыш логалыныт. Ты проектлан кӧра Тюмень оласе «Самырык атмосфере» («Молодёжная атмосфера») ушемын лидерже-влак дене палыме лийынна.
Курыкмарий районысо «Самырык инициативе тӱшка» дене пырля пашам ыштена. Нунын эртарыме «Кравец» форумыш, районысо школ активышке миенна.
«ВийАрын» еҥже-влак «Таврида», «iВолга», «Селигер» форумлаште кажне ийын участвоватлат.
Тыгак республикыштына илыше калык-влакын молодежный ассамблейыштышт улына.
— Ончыкылык планда могай?
— Кино идалыклан пӧлеклалтше икмыняр мероприятийым ямдылена. Талешке кечылан Республикысе йоча да самырык-влаклан театр-рӱдер дене йоча концертым ончыктынена. 24 апрельыште рӱдерыш пагален ӱжына.
Ме кыртмен пашам ыштена. Ынде, закон дене келшышын, Марий Эл Республикысе тӱвыра да келшымаш кыл шотышто регионысо «ВийАр» («Мудрость») мер ушем улына.
— Тыйын шонымаште, таче «ВийАр» виян организаций? Ончыл верыш тудо мом шында?
— Мыйын шонымаште, «ВийАр» — самырык тукымын брендше. Ончыкшымат тыгак лийын кодеш, ӱшанем. Чолга ӱдыр-рвезе-влакым ушемышкына ушнаш ӱжына.
«ВийАр» – тиде толкын,
«ВийАр» – тиде вий.
«ВийАр»-ышке толын,
Тыят йолташ лий!

Анастасия Эманова ямдылен.

Кидшер
Шонымашым ешараш