Раисия Сунгурова, Аланур НаюкШукерте огыл, «Кидшер» интернет-журнал пелен шкешотан электрон книгагудо пашам ышташ тӱҥалын. Тыште марий мутер, сылнымутан книга да тӱрлӧ сборник-влак вераҥдалтыт. Таче электрон фондыш Раисия Сунугрован «Чайгоркаште сандалык» книгаже пурталтын.
Тиде книга «Светланан книгагудыжо» серийым почшо икымше мутпого. Вес велым, тудо виян марий поэтессе С.Эсаулова лӱмеш 2014 ийыште ыштыме «Светлана» сылнымут лӱман конкурсышто сеҥыше икмыше книга. 
Палемдыман, «Чайгоркаште сандалык» книга Марий Элысе «ВийАр» тӱвыра да келшымаш кыл шотышто ушемын эртарыме «Книга — яллан» акцийыштыже лийын.
Аланур Наюк (Раисия Сунгурова) Параньга район, Олор ялеш шочын. Верысе кыдалаш школышто, Марий кугыжаныш университетын журналистике факультетыштыже тунемын. 2008 ийыште «Ош шовычан у эр» икымше книгам савыктен. Сургут оласе «STERX» галерейыште вӱдышӧ методистлан пашам ыштен. «Марий ушемын» верысе пӧлкажым вуйлатен, «Юмарий» этнотӱвыра ансамбльым чумырен. Таче тудо икшывым кушта.
«Возымем арака гай, – манеш поэтесса, – жап эртыме дене эре уэмдалт тӧрлалтеш, вияҥеш. Чоткыдо лиеш ман ӱшанем».

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.