«Ямде лий» йоча-влаклан пӧлеклалтше газет ынде ятыр ий «Марий Юнкор» слётым эртара. Тений слёт юбилейный — луымшо гана эрташ тӱҥалеш. Ончыч слёт-влак Советский, Шернур, Морко, Волжск районлаште, Йошкар-Олаште да Таир ер воктене эртеныт гын, тений Регион-влак кокласе «Марий Юнкор — 2015» слёт угыч Йошкар-Олаште икымше гыч шымше июнь марте эртаралташ тӱҥалеш. Республикнан тӱрлӧ районла гыч коло юнкорым ӱжмӧ. Тидын годымак организатор-влак Пошкырт, Одо да Татарстан, кундемла гыч эн чолга возышо ӱдыр-рвезе-влак ӱжмашым налыныт.
Юнкор-влаклан марий журналист, поэт, писатель, тӱвыра пашаеҥ-влак дене оҥай вашлиймаш, мастер-класс, весела программе-влак ямдылалтыт. Каласен кодыман, тиде слётын ончыкылык журналистым, писательым да поэт-влакым куштымаште надырже кугу.
