«Ончыко» журнал 2015 ийын икымше пелыштыже могайрак лиеш? Мом тушто оҥайым лудаш ямдылалташ лиеш? Тидын нерген «Ончыко» журналын тӱҥ редакторжо Анатолий Тимиркаев нине йодыш-влаклан тыгайрак вашмутым пуыш: Журналын пагалыме таҥже-влак! Журнал могай автор-влак дене тендам куандараш шона «Ончыко», кÿчыкын радамлен лектына. Шомакнам эн ончыч «Лудыш» ужаш нерген тарвана. Аркадий Фёдоров «Чавайн» романжым умбакыже шуя (тÿҥалтышыже 2008 да 2013 ийлаште савыкталтын). Валентин-Осипов-Ярча «Толкын тÿрлем» лÿман романым ямдыла. Василий Патрашын «Фронтовик-влак», О.Миккын «Тыйже мыйын титакдымемжым палетыс…», Светлана Бессонован «Мирон Очи», Александр Зайнын «Аймет» повестьышт портфельыштына улыт.
Юрий Галютин, Мария Илибаева, Анатолий Оръю, Владимир Сэмэҥэр, Эврик Анисимов, Юрий Соловьев, Валерий Бердинский, Аркадий Богданов Микывыр Лаймыр, Елена Юнусова, Илья Ёлкин, Зинаида Тимирбаева да молат у ойлымашышт дене куандараш тÿҥалыт.
«Поэзий» лукнат поян лийшаш. Альбертина Иванова, Зоя Дудина, Альберт Васильев, Виталий Ози, Надежда Васильева, Татьяна Соловьева у поэмыштым, почеламутыштым ямдылат.
Ончылно палемдышна, вес ий Российыште Сылнымут идалык семын эрташ тÿҥалеш, сандене ме республикысе да вес кундемласе марий-влакын литератур илышышт, пашашт нерген утларак ойлаш тўҥалына. Адакшым 2015 ийыште марий писатель-влакын черетан съездышт лиеш.
«Кончершомак» ужашыште Геннадий Гордеев, Зинаида Долгова, Валерий Григорьев, Валерий Абукаев, Александр Петров у пьесышт дене палымым ыштат.
Ончылно палемдышна, вес ий Российыште Сылнымут идалык семын эрташ тÿҥалеш, сандене ме республикысе да вес кундемласе марий-влакын литератур илышышт, пашашт нерген утларак ойлаш тўҥалына. Адакшым 2015 ийыште марий писатель-влакын черетан съездышт лиеш.
Вес ий лÿмгечылан поян. 125 ий темеш Н.С.Мухинын шочмыжлан, 120 ий — Никон Игнатьевлан, 115 ий — Василий Элмарлан, 110 ий — Василий Патрашлан, 100 ий — Осмин Йыванлан, Анатолий Биклан, Луков Паюлан, Александр Янгильдинлан, 90 ий — Семён Вишневскийлан, 80 ий — Валентин Колумблан, Валентин Исенековлан, Давлет Исламовлан, 75 ий — Юрий Галютинлан, Гельсий Зайниевлан, Аркадий Богдановлан, 60 ий — Геннадий Алексеевлан, Валериан Якимовлан, 55 ий — Леон Раялан. Нуно да да моло юбиляр-влак нерген шарнымаш, очерк, вашмутланымаш ямдылалтыт.
