Кок ий калык дене пырля

Таче «Кидшер» интернет-журнал изирак лӱмгечыжым пайремла. Таче мыланна кок ий!
Кок ий ончыч, теле тылзын 15-ше кечынже, кастене, чолга марий рвезе-влак у интернет-журналлан тӱҥалтышым пыштеныт. Ты савыктышым «Кидшер» манын лӱмденыт. Интернетвотысо журнал марий сандалыкыште эртыше мероприятий, событий-влак нерген увер-влакым Марий Эл республикын кугыжаныш йылме-влакше дене (олык марий, курык марий да руш йылме дене) лудшо-влак деке намиен шукташ шонен ышталтын. «Кидшер» гоч лудшо-влаклан увер-влак, тӱвыра, туныктымо да воспитаний аланыште тӱрлӧ вашлийын мутланымаш да шуко моло информаций темлалтеш.
Таче «Кидшер» интернет-журналым Российыште гына огыл, уло тӱняште лудыт, вет интернетвот гоч уверым моткоч писын да шке жапыштыже пален налаш лиеш.
Увер-влакым лудмо деч посна «Кидшер» тӱрлӧ конкурсым, акцийым да мероприятий-влакым эртара.
2015 ий – Россий кумдыкышто Сылнымут идалык семын палемдалтын. «Кидшер» ты идалыклан пӧлеклалтше  VII Марий самырык тукым слёт - Кидшер (19)«Сылнымут мундыра» конкурсым увертарен ыле. Тудым мучашлаш жап толын шуын. Тиде конкурсышто шке вийыштым 9 самырык возкалыше-влак тергеныт. Жюри член-влак каҥашымек, сеҥыше радамыш кок сылнымутчым лукташ келшеныт. Тиде – Ирина Курочкина (Йошкар-Ола) ден Раисия Сунгурова (Сургут).
«Марий улмем дене кугешнем» фотоконкурсыш кодшо ий деч таҥастарымаште шукырак паша пурен. 28 еҥ тӱрлӧ фото-влакым колтен. Чын ойлена, пашам ойыраш пеш йӧсӧ лийын. Туге гынат, сеҥышым палемдыме. Уло кумылын Виктория Папаевам  (Одо, Ижевск) саламлена.
«Кидшер» интернет-журнал дене пырля» конкурсыштына Ирина Курочкина (Йошкар-Ола) сеҥыше радамыш лектын.
Чаманен каласаш логалеш,  «Мый да мыйын республикем» конкурсышто ик еҥат шке вийжым терген огыл.
Пагалыме лудшына-влак, тендан иктаж темлымашда але тыланымашда лиеш гын, info@kidsher.ru эл. почтышкына серышдам вучена!

Кидшер
Шонымашым ешараш