Ужар лышташ камвозо мландӱмбаке,
Мотор куэмын укш деч ойырлен.
Мардеж наҥгайыш модыктен умбаке,
Урем йолгорныш пыштыш пӧрдыктен.
Куэ-аважым тыгеракын кодыш:
ала жап шуын йӧршын ойырлаш?
Эр кечыйоллан лийын тудо модыш,
А кызыт корнывожышто кияш?
Эрта айдеме, шиждегеч тошкалын…
Кузе лышташ чыла чытен кертеш?
Кеч вий-куатым ок керт тудо налын,
Шӱм-чонжо тидланак кошкен шортеш!
Ужеш кеч эреак кавам да кечым,
Пиалын тидын тамже кочырак.
Молан гын тиде шучко мардеж верчын
Тӧшакше лие корнысо пурак?
Шортеш куэ лышташ, а шинчавӱдшӧ
Нӧрта пуракым, шем кышам коден.
Эрта кечат, эрта пычкемыш йӱдшӧ…
Лышташ кошкен, шинчавӱдшат пытен.
Уэш мардеж трук наҥгая умбаке,
Йомеш лышташ, пыта кошкен, шула.
Кеч мыйын шӱмым саке тул ӱмбаке :
Наҥгайыш тудо чонемат пырля.
Лышташ гаяк улам мый ты тӱняште,
Чын корно деч молан гын торленам?
Чучеш мылам –йомам, но, шонымаште
Чонем –ужар лышташым –кычалам!
Владимир Матвеев