Ит вучо сылне шошым –
Ок пӧртыл тый декет.
«Таҥемже мӧҥгӧ толжо…»-
Шке семынет шонет.
Арам пычкемыш йӱдым
Тый тудым шоненат.
Вара, вашмут деч лӱдын,
Шудалын шортынат.
Арам тый ужатальыч
Да сӧрышыч вучаш,
Но шкетынак кодальыч…
Тыгай йӧратымаш.
Возен качет: «Ит вучо.
Мый весым йӧратем…»
Кузе шӱметлан чучын?!
Пустаҥын оҥ, палем.
Но кӧргӧ чонын йӧсым
Чытен илен лекман.
Вашлийын жап гыч весым,
Лият тый пиалан.
Владимир Матвеев