Лыжга мардеж товаҥше укшым
Тӧрлаш тырша, шыман пуал…
Авам нӧлтале шовыч лукшым –
Каем умбак, суртем кодал.
Пуа мардеж. Уэш ниялтыш
Чылт авамла ласкан, лыжган.
Вара тупем гыч шып пералтыш:
«Корнетше лийже пиалан!»
Палем мый, корныштем авамжым,
Мардеж лач алмашта докан.
Ойырлымашын кочо тамжым
Мый таче шӱмыштем шижам.
Ойырлымаш… Молан гын тудо
Ишен пура шӱм-чонышкем?
Мардеж товаҥше укш ден модо,
А кызыт угыч воктенем…
Владимир Матвеев