Калык усталык да культурканыш паша шотышто республикысе шанче-методик рӱдер калык-влак коклаште кылым пеҥгыдемдымаште, калык усталыкым арален кодымаште да вияҥден колтымаште кугу пашам наҥгаен шога. Тӱрлӧ фестиваль да конкурс-влак ятыр эртаралтыт. Поснак «Ший памаш» фестиваль-конкурсын эртен толмо корныжо моткоч поян.
Икымше гана «Ший памаш» марий эстраде муро фестиваль-конкурс республик кӱкшытыштӧ 1995 ийыште эртен. Варажым, регион-влак кокласе марий муро фестиваль-конкурсыш савырнен да 1999 ий гыч кок ийлан ик гана эртаралтеш. 2009 ий гыч финн-угор тӱням авалтен шога да тачысе кечылан «Ший памашыш» Башкортостан, Удмуртий, Татарстан, Коми республикла, Хант-Мансий автономный округ, Свердловск область гыч ятыр самырык мурызо ден мурышо ансамбль-влак ушненыт.
20 ий жапыште 130 утла солист да 30 наре мурышо ансамбль шке вийжым «Ший памаш» фестиваль-конкурсышто терген – тиде марий эстрадын шӱдыржӧ-влак Влад Николаев, Эльвира Попова, Людмила Соловьева, Нина Казашова, Светлана Львова, Надежда Васканова, Светлана Яндукова, Надежда Пашкина, Валерий Петров, Эльвира Токташева, Ирина Юшкина, Дмитрий Атласкин, Марина Почтенева, Татьяна Кибаева, «Вената» дуэт, «Юлавий» ден «Мурйолва» ансамбль-влак, Татарстан гыч Валентина Сидорова, Башкортостан гыч Снежанна Сайфутдинова, Дина Баюршина, Роман Мусагитов, Марсель Салимов, Алена Тимерханова, Удмуртий гыч Марина Галичанина, «Алнаш мылкыд» ансамбль, Коми республик гыч «Июль» ансамбль, Свердловск область гыч Елена Иванова да шуко молат.
Самырык мурызо-влак уло кумылын кумдан палыме поэт ден композитор-влакын мурыштым йоҥгалтарат. Тыште Альбертина Иванован, Вячеслав Абукаев-Эмгакын, Василий Регеж-Гороховын, Валерий Кульшетовын, Вениамин Захаровын, Сергей Маковын, Алексей Яшмолкинын, Владислав Куприяновын лӱмыштым палемдыман.
Тыгак самодеятельный композитор-влакын — Владимир Юшкинын, Вячеслав Осиповын, Михаил Кузнецовын, Валерий Садретдиновын – ятыр мурышт фестиваль-конкурсын сценыж гыч йоҥгеныт.
«Ший памаш» самырык поэт ден композитор-влакланат корным почеш. Эсогыл пытартыш жапыште самырык мурызо-влакат мурылан мутым да семым шкеак возат. Тыште Володя Матвеевым, Алена Яковлевам, Артур Ефремовым, Эльвира Поповам да молымат палемдаш лиеш.
Тений регион-влак кокласе «Ший памаш» финн-угор эстраде муро фестиваль-конкурс нылымше гана, 19-21 ноябрьыште эрташ тӱҥалеш.
Тышке финн-угор тӱня гыч у мурызо-влак (16 гыч 35 ий марте) да 5 еҥ марте мурышо ансамбль-влак (ийгот шотышто кышкар уке) ушнен кертыт.
Участник-влак тӱрлӧ сынан 3 мурым ямдылышаш улыт: калык муро (аккапельно (семӱзгар да фонограмме деч посна), шлягер (калыкыште кумдан палыме да йӧратыме муро) ден у муро (фонограмме почеш). Икымше мурым (шлягер) конкурсант-влак 19 ноябрьыште Шернур тӱвыра пӧртыштӧ мурат. Вара фестиваль-конкурс Йошкар-Оласе В.И.Ленин лӱмеш тӱвыра полатышке кусна. 20 ноябрьыште участник-влак калык муро ден у мурым йоҥгалтарат. «Ший памаш» 21 ноябрьыште кугу гала-концерт дене мучашлалтеш. Тыште сеҥыше-влакын лӱмышт пале лиеш.
Марий да финн-угор мурым йӧратыше-влакым фестиваль-конкурсын концертлашкыже пагален вучена.
Роза Искакова