Николай Иванович Любимов (1996 пеледыш 16, Марий Эл Республик, У Торъял кундем, Элеволко ял) — журналист да мер пашаеҥ. Олык Ипай лӱмеш сылнымут, тӱвыра да сымыктыш пашаште Марий Эл Республикысе самырык-влаклан Кугыжаныш премийын лауреатше (2022).
Илыш корно
1996 ий пеледыш тылзын 16-шо кечынже У Торъял район Элеволко ялеш шочын-кушкын. 9-ше класс марте верысе Токтарсола школышто тунемын, вара У Роҥго кунем Ӱшнӱр кыдалаш школышто шинчымашым поген.
2013 ий теле тылзын 15 кечынже йылмызе Андрей Чемышев дене «Кидшер» интернет-журналым негызленыт.
Марий кугыжаныш университетыште Калыкле тӱвыра да тӱвыра кокласе кыл шотышто интститутышто «Педагогическое образование» направлений дене кӱшыл шинчымашым налын (2014-2018).
Марий Эл Республикысе тӱвыра да келшымаш кыл шотышто регионысо «ВийАр» мер ушемын председательже лийын (2016-2018).
2018 ий гыч марий телевиденийыште пашам ыштен. «Марий Эл увер» программын корреспонденте, «Марий Эл увер» эр программын вӱдышыжӧ лийын.
2020 ийыште Марий кугыжаныш университетыште «Финно-угорская филология» программе дене магистр пашам арален. 20 утла шанче публикацийын авторжо.
2020 ий шорыкйол тылзын 10 кечыже гыч Марий Эл Республикын Тӱвыра, савыктыш да калык-влакын пашашт шотышто министрын пресс-секретарьже.
Чап
- «Марнетын шӱдыржӧ-влак» («Звёзды Марнета») сайт-влак конкурсын сеҥышыже Диплом (2016)
- «Вячеслав Абукаев-Эмгак» шарнымаш медаль (2018)
- «Ростелеком» ПАО-н «Вместе в цифровое будущее» конкурсын посна призше (2019)
- «Марий Эл Республикын самырык-влакын кадр резервышт» Марий Эл Республик Вуйлатышын проектын сеҥышыже (2019)
- Марий Эл Республикын Тӱвыра, савыктыш да калык-влакын пашашт шотышто министрын Таумутшо (2021).
- Марий Эл Республикын Тӱвыра, савыктыш да калык-влакын пашашт шотышто министерствын Чап таныкше (2022).
- Марий Эл Республикысе Олык Ипай лӱмеш Кугыжаныш самырыктукым премийын лауреатше (2022).