21 июньышто Пеледыш пайрем жапыште марий национальный культур фестиваль лиеш. Тудым Марий Эл Республикын Молодежь правительствыже эртара.
Организатор-влакын увертарымышт почеш, фестивальын тÿҥ мероприятийже – тÿшкан шогалын марла куштымаш – Ленин площадьыште 18 шагатлан лиеш. Калык сем ÿзгар ансамбль-влакын шоктымышт почеш олыкмарий-влакын куштымашкышт кажне кумылан еҥ ушнен кертеш.
Фестивальын участникше-влаклан molmincult12.ru сайтыште регистрироватлалтман. Эн ончыч регистрироватлалтше 500 еҥым фестивальын эмблемыжым сÿретлыман пöлек вуча. Организатор-влак марий вургемым чиен толмылан куанат. Тыгак шкешотан рекордым палемдаш шонат: тÿшкан, чарныде, 15 минут куштыман. Ушештарена: тений Пеледыш пайрем «Калык шуко, элна икте» девиз почеш эрта. Пайремым Тÿвыра, печать да калык-влакын пашашт шотышто министерстве, Марий тÿвыра рÿдер, Мер Каҥаш, Марий калык конгресс, тыгак икмыняр мер организаций эртарат.
Пайрем мероприятий-влак 9 шагатлан Пÿнчерысе Тумер аланыште (Йошкар-Ола) тÿҥалыт. Тыште Агавайрем калык йÿла пайрем лиеш.
Ты жапыштак Рÿдö паркыште кудо-влакым (уна пöрт-шамыч) вераҥдаш тÿҥалыт. Тушто декоративно-прикладной сымыктышын мастарже да районысо производитель-влак сатуштым ужалымашке луктыт. Кудо-влак 11 шагат гыч 15 шагат марте пашам ыштат. Тений эн сай кудо конкурс лиеш.
10 шагатлан Ленин лÿмеш тÿвыра полат ончылно Йошкар-Ола да Марий Эл Республикысе районла гыч усталык коллектив-влак, мер организаций да национально-культурный объединений-влакын еҥышт чумыргат. 11 шагатат 15 минутлан пайрем калык Ленин проспект дене Ленин лÿмеш площадьышкыла ошкылеш. Тушто 12 шагатлан Пеледыш пайрем торжественно почылтеш да театрализоватлыме представлений лиеш.
13 шагатлан пайрем калык Комсомольский урем дене Рÿдö паркыш тарвана. Тушто кечыгут тÿрлö пайрем мероприятий-влак лийыт. Пеледыш пайрем Ленин площадьыште мучашлалтеш. Тушто 19 шагат гыч 22 шагат марте марий эстрадын артистше-влак дене пырля этнодискотеке лиеш.
«Кугарня» газетын ответственный секретарьже Ирина Золотарева,
Марий Эл Республикысе тӱвыра, печать да калык-влак паша шотышто
министерствын сайтше гыч налме материал