29 июньышто шке пашажым тӱҥалын. Ушештарем, слёт Параньга районысо Олор школ пелен эрта. Кызыт слётыш индеш лу наре самырык, нунын коклаште Марий Эл, Одо, Пошкырт, Провой, Киров, Пермь, Татарстан, Ханты-Мансийск, Свердловск кундем гыч погыненыт.
Теҥгече участник-влакым ныл лужалан (отрядлан) пайленыт. Самырык-влак, слётын программыштыже участвоватлен, усталык мастарлыкым шуарыше пашашке ушнат: лекций да семинар занятий-влак, шымлызе, мер пашаеҥ, депутат, кидмастар, яра жапым да тазалыкым пеҥгыдемдыше мероприятий-влакым организоватлыше-шамыч дене вашлиймаш, тыгак тӱвыра-историй верлашке экскурсий-влак лийыт. Слётыш толшо-влак сайлымаш кампаний, тӱрлӧ кӱкшытшӧ депутат паша нерген шуко пален налыт да шкештат тидын гоч модын эртат.
Тыгак слёт кышкарыште самырык-влакын Правительствышт лиеш. Слётын организаторжо-влак палемдат: «Слёт ончыко ончышо шонымаш-влакым илышыш шыҥдара: самырык тукымын илышкыл чолгалыкшым нӧлта, тудым марий калыкын тӱвыражым да йылмыжым аралымашке да вияҥдымашке шке надыржым пышташ кумылаҥда; калык ден тӱвыра-влак кокласе кылым вияҥдаш полша; пӱтынь Российысе икоян улмым, икте-весым пагалымаш кумыл-влакым вияҥда». Таче, кумлымшо июльышто, 14 шагатлан Россий кӱкшытан VI марий самырык тукым слётым официально почыт.