Марий йылмым аралымаште да вияҥдымаште шуко паша ышталтеш: у технологийым илышыш шыҥдарат, марий концерт-программым калыклан эртарат, интернетыште тӱрлӧ марий проект-влакым вӱдат. Ик могыр гыч ончалаш гын, марий йылме аралалтеш да вияҥеш, а вес могырым кузерак?
Лачак тиде да моло йодыш-влаклан вашмутым «Йыргешке пӱкен» клубыш погынышо-влак кычалаш да каҥашаш тӱҥалыт. Мутланымашышке, тӱрлӧ виктышыште, сферыште тыршыше еҥ-влак погынат. Вашлиймаш 9 декабрьыште 18:00 шагатлан Т. Евсеев лӱмеш Национальный тоштерыште эртаралтеш.
Ты гана «Йыргешке пӱкенын» тӱҥ унаже марий лингвист, компьютер йылмызе Андрей Валерьевич Чемышев лиеш. Толза, мутланымашке ушныза! Чыладамат уло кумылын вучена.