Тений 8-13 июльышто Марий Турек район Сардаялысе школышто Марий самырык тукым слёт лиеш, палдарат организатор-влак.
Тудо Российысе калык-влакын тӱвыра поянлык идалыкыштлан пӧлеклалтеш. Тушко 16 -25 ияш ӱдыр-рвезе-влак Марий Эл, Башкортостан, Татарстан, Удмуртий Республикла, Киров, Угарман, Свердловск, Пермь, ХантМанси кундемла да моло верла гыч ушнен кертыт.
Слётыш ушнаш манын, 1 июнь марте «Молодёжь России» автоматизироватлыме информаций системыште регистрацийым эртыман. Иктешлымаш сайтыште 20 июнь марте пале лийшаш.
Слётышто усталык паша, этнотуризмын, проект пашан, мер толкынын вияҥмыж дене кылдалтше интерактивный тунемме занятий-влак лийыт, молодёжный проект-влакын презентацийыштым ончыктат, тӱвыра исторический верлашке экскурсий дене миен коштыт, спорт программе да молат эртаралтыт. Участник-влак деке вашлиймашке кугыжаныш да мер пашаеҥ, учёный, артист-влак мият.