Регион-влак кокласе «Рубежи Победы» патриотический марафон Йошкар-Олаште эртен. Тудо Кугу Отечественный сарысе тылын труженикше-влакым шарнымылан пӧлеклалтын.
Марафон кышкарыште мероприятий-влакым Чуваший, Татарстан, Пошкырт, Мордовий республиклаште, Ульяновск ден Угарман кундемлаште эртареныт.
Республикысе кугыжаныш архивыште регион-влак кокласе шанче-практике конференций лийын. Тушко Приволжский федеральный кундемын куд регион гыч шанчыеҥ, архив, тоштер, книгагудо пашаеҥ ден краевед-влак погыненыт.
Э.Сапаев лӱмеш академический опер да балет театрыште Чуваш кугыжаныш опер да балет театрын артистше-влак «Сурский рубеж» оперым ончыктеныт.