Йошкар-Олаште вӱргечын поҥго нерген ончер ышташ тӱҥалеш. Т. Евсеев лӱмеш калыкле тоштерыште тиде 28 июнь гыч «Поҥго жап» ончер почылтеш.
Экспозиций республикыште кушшо шляпан поҥго, нунын кушмо верышт, Борис Васильковын шанче пашаже-влак дене палымым ышта. Борис Павлович — шанчыеҥ-миколог, биологий шанче кандидат. Тудо 1931-ше гыч 1939 ий марте Марий кундемыште поҥгын шарлымыжым, систематикыжым шымлен, шапашыжым рашемден. Тудак марий флорым шымлаш геоботаник экспедицийлам ямдылен да эртарен. Тоштерын уверже почеш, 2008-ше ийлан 97 861 тӱрлӧ поҥгым шымлыме. Нунын кокла гыч шым тӱжем нарыже шляпан поҥго улыт.
Выставкыште поҥгын муляжше-влакым ужаш лиеш. Нуным Марий шанче-краеведений тоштерын заказше почеш 1980-шо-1981-ше ийлаште лӱмын ямдылыме. Тыгак Борис Васильковын шанче пашаже-влакым, «Кугу Какшан» заповедникын кугурак шанче пашаеҥже Геннадий Богдановын да фото конкурслан участникыштын фото сӱретыштым ончыктымо. Экспозиций икымше октябрь марте пашам ышта, паладара «Марий Эл» кугужынаш теле- радио компаний.