М.Шкетан лӱмеш Марий драме театрын артистше-влак эрвел кундемыштыла илыше марий-влак деке гастроль дене миен коштыныт. 6-10 августышто Одо да Татарстан кундемласе яллаште «Ӱдыр таҥлан сай пелаш» спектакльым модын ончыктеныт.
Пыргынде, Кӱгорем, Элнет, Кӱплык, Уял яллаште калык марий артист-влакын модмыштым моткоч куанен вашлийын. Спектакль деч вара ончышо-влак шаланен каяш вашкен огытыл, шинчаваш ончен мутланаш кумылышт лийын. Еҥ-влак Шкетан театрым, тудын профессионально кугу кӱкшытыштӧ шындыме постановкыжым шке денышт чӱчкыдынрак ужнешт.
Гастроль гыч артист-влак моткоч нӧлталтше кумылан пӧртылыныт. Марий Эл деч ӧрдыжтӧ илыше родына-влакын шочмо йылмылан шӱман улмышт, школышто марий йылмым туныктымышт, тудын дене кугешнымышт, шкеныштын поро чонышт куанен ӧрыктарен.
Кеҥеж жапыште гастрольыш лекташак, Шкетан театрын чапле спектакльже дене родо-шочшына-влакым палдарашак да икте-весе коклаште кылым пеҥгыдемдашак кӱлеш – теве тыгай шонымашан пӧртылын усталык группына корно гыч.