Калык усталыкын «Марий Эл — вийын верже» республике кӱкшытан фестивальже Йошкар-Олаште эрта. Ленин лӱмеш тӱвыра полатыште 7-ше октябрь гыч 4-ше ноябрь марте республикысе фестивальын отчёт концертше-влак лийыт. Мероприятий Кугу Ачамланде сарыште Сеҥымылан 80 ий теммылан пӧлеклалтше «Салют Победы» республикысе калык усталык фестиваль кышкарыште эртаралтеш.
Фестивальыште кундемысе 14 район да кум ола гыч 300 утла усталык коллектив участвоватла. Фестиваль 7-ше октябрьыште 14 шагатлан почылтеш. Тиде кечын отчёт концертым Килемар, Курык марий, Медведево район да Козьмодемьянск ден Волжск ола-влак ончыктат.
8-ше октябрьыште Оршанке, Звенигово, У Торъял районла да Йошкар-Олан мастарлыкыштым ончаш лиеш. 21-ше октябрьыште Шернур, Волжск, Куженер, Юрино район-влак сценыш лектыт.
22-шо октябрьыште Советский, Марий Турек, Параньга, Морко район- влакын кечышт лиеш. А 4-ше ноябрьыште фестивальын лауреат ден дипломантыштын гала-концертышт вуча.