Йошкар-Олаште калыкле костюмлан премийым пуат. Рӱдӧ олаштына 27-ше октябрь марте «Яндар памаш деч» Республике кӱкшытан калыкле костюм конкурсышко ушнаш йодмашым налыт. Тушко кружок ден студийлан, масткерскойлан, модо театрлан, вургем театрлан усталык коллективышт, посна пашам ыштыше мастар, сӱретче-модельер, туныктышо да педагог, искусствовед, тоштерлан шанче пашаеҥышт ушнен кертыт.
Тӱвыра министерствыште увертарыме почеш, конкурсышто кум номинаций лиеш: этнографий костюм, кызытсе автор костюм да сценылык костюм.
Йодмашым республикысе калык усталык рӱдер налеш. Сеҥыше-влакым декабрьыште палемдаш тӱҥалыт.