13 февральыште Морко районысо Коркатово лицейыште «Шочмо йылме – калыкын поянлыкше» йоча фестиваль эртаралтеш. Мероприятий Шочмо йылмын тӱнямбал кечыжлан да Тӱп калык-влакын йылмышт шотышто тӱнямбал идалыклан пӧлеклалтын.
Тӱвыра-туныктыш мероприятийыш школлаште, йочасадлаште, тӱвыра тӧнежлаште тыршыше пашаеҥ ден тунемше-влакым ӱжыт. Марий кугыжаныш йылме деке мелын шогышо, тудым вияҥдымашке надырым пышташ кумылан кажне еҥым организатор-влак вучат.
Эн ончыч индеш занятий класслаште тӱҥалыт. Республикысе школлаште марий йылмым устан туныктышо, Марий Элын сулло да калык туныктышыжо-влак: марий йылме, тӱвыра да калык йӱла дене кылдалтше темылан мастар классым эртарат.
Калык поэт Геннадий Сабанцев-Ояр лицейысе юнкор-влак дене почеламутым возымо радамым рашемда, усталык пашаже дене палдара. Класслаште эртарыме занятий-влакын лектышышт нерген фестивальын унаже-влакым сценыште урок жапыште шуктымо пашашт дене палдарат.
Фестиваль концерт дене мучашлалтеш, чолга тунемше ден эксперт семын пашаланыше туныктышо-влакым палемдаш тӱҥалыт.
Фестиваль марий йылмым, тӱвырам, калык йӱлам аралымашке да вияҥдымашке, кушкын шогышо тукымым патриот шӱлышеш шуарымашке виктаралтын.