Йошкар-Олаште шочын-кушшо Алексей Алексеев ынде коло ик ий Эстонийыште ила. Тушто Таллин университетысе кино факультетым, варажым магистратурым тунем лектын. А кызыт кафедрыште эстон йылме дене журналистикым туныкта, кинорежиссер-влакым ямдыла.
Тунемшыже-влаклан дегитальный композиций, видеокомпозиций, режиссура нерген каласкала, видеомонтаж, продюсер паша денат палдара. Тудын тунемшыже-влак университет деч вара Английыште шинчымашым пойдарат. А яра жапше годым Алексей кином войза. Эстонийыште тудын «Этномедиа» компанийже уло. Тудым марий-влак нерген кином ышташ чумырен.
Кеҥежым режиссёр «Шкетанын мландыштыже» фильмым ныл йылме дене возен ыле. А шукерте огыл Яков Павлович Майоров-Шкетанын возымо «Кок сӱанат пеле» пьесыжым марий гыч эстон йылмышке кусарен. Тидын нерген Алексей Алексеев видео-интервьюшто каласкала.
Ушештарем, «Кок сӱанат пеле» эстон йылме дене пьесым 26 апрельыште 2015 ийыште ончыктат.
