Тений «Марий Эл» газет шӱдӧ ияш лӱмгечыжым палемда. Лӱмгечылан пӧлеклалтше ятыр мероприятий эрта. Шукерте огыл, журналист, тӱвыра да мер пашаеҥ-влак Медведево районысо Усть-Кундыш ял воктене пӱнчӧ-влакым шынденыт.
«Шӱдӧ ий – шӱдӧ пушеҥге» акцийыш Марий Эл Республикысе тӱвыра, печать да калык-влакын пашашт шотышто министр Михаил Васютин, печать да массовый коммуникаций управлений начальник Владимир Маркин да консультант Олег Тихонов, тыгак «Марий Эл», «Кугарня», «Ямде лий» газет да «Ончыко» журналын пашаеҥже-влак ушненыт. Ик шагат жапыште 40 утла еҥ 3500 пӱнчым шынденыт.
«Газетым савыкташ ятыр кагаз кӱлеш. Кагаз пушеҥге гыч ышталтеш. Тек шындыме пушеҥгына илана, а «Марий Эл» газетна чаплана!» — ойлат газетын пашаеҥже-влак.
«Марий Эл» газетын лӱмгечыжлан пӧлеклалтше мероприятий-влак идалык мучаш марте эрташ тӱҥалыт.
Калык куанен лудеш… Ончаш »
Денис Речкинын фотожо.